13-августта, «Мекенчил» саясий партиясынын съезди болуп өттү. Ага кырктай депутат катышып, талапкерлердин тизмеси Борбордук шайлоо комиссиясына тапшырылды. Бул тууралуу аталган партиядан “Марал” радиосуна билдиришти.
- Бүгүн пандемияга байланыштуу 45 адамдын катышуусунда партиянын кезексиз съезди болду. Анын жүрүшүндө талапкерлердин тизмеси бекитилип, партиянын программасы презентацияланды. Съезд БШК мүчөсүнүн катышуусунда өттү, — деп билдирди партиядан.
«Мекенчил» партиясынын лидери — Жогорку Кеңештин мурунку депутаты Камчыбек Ташиев. Ошондой эле бул партияда азыркы депутаттардан Курманкул Зулушев бар. Мындан тышкары 5-чакырылыштын депутаттары Жылдызкан Жолдошева, Равшан Сабиров кирген.
Жылдызкан Жолдошева 5-чакырылышта «Ата-Журт» партиясы менен барса, Равшан Сабиров «Ата-Мекен» партиясы менен депутат болгон.
Сабиров 2011-жылы Социалдык өнүктүрүү министри болуп дайындалып, 2012-жылы пара алууга шектелип кармалган. Бирок көп өтпөй Биринчи май райондук соту аны актап чыгарган соң, министрлик кызматына кайтып барган.
6-чакырылыштын депутаттарынан жалгыз Курманкул Зулушев “Мекенчилдерге” кошулган. Ал буга чейин «Ата-Журт» партиясынан депутат болуп барган.
Парламенттик шайлоого катышуу ниетин билдирген партиялар 20-августка чейин съезддерин өткөрүп, талапкерлердин тизмесин БШКга тапшырышы керек.
Булак: https://maralfm.kg/
Автор публикации
